Бекбау Бақберген Ермекбайұлы «Гидродинамикалық процестерді модельдеу: гидродинамикалық симуляторды әзірлеуден машиналық оқытуға дейін» тақырыбында баяндама жасады

            2026 жылғы 2 наурызда Л.Н. Гумилев атындағы Еуразия ұлттық университетінің «Механика» кафедрасының ғылыми семинарында философия докторы (PhD) Бекбау Бақберген Ермекбайұлы «Гидродинамикалық процестерді модельдеу: гидродинамикалық симуляторды әзірлеуден машиналық оқытуға дейін» тақырыбында баяндама жасады.

            Баяндамада ол мұнай-газ және экологиялық инженерия салаларындағы күрделі процестерді сандық модельдеудің заманауи тәсілдерін қарастырды.

            Зерттеу жұмысының негізгі бағыты - гидродинамикалық модельдеу үшін отандық компьютерлік бағдарлама әзірлеу және оны тәжірибелік есептерде қолдану. Осы бағытта Бекбау Б. Е. құрамына қара және композициялық мұнай модельдеріне негізделген екі симулятор кіретін KMGEsim бағдарламалық кешенін ұсынды. Кешенді коммерциялық гидродинамикалық симуляторлардың (ECLIPSE, tNavigator және т.б.) баламасы ретінде қарастыруға болады, және ол өндірістік деңгейдегі есептерде тексерілген.

            Баяндаушы сондай-ақ ұңғы маңындағы аймақтағы ағын процестері, су конусының қалыптасуы, гельдік технологиялар арқылы ағынды басқару, сондай-ақ қышқылды гидрожару процестерін модельдеу нәтижелерін көрсетті. Зерттеу нәтижелері қолданылған технологиялардың тиімділігін арттыруға және мұнай өндіру процестерін оңтайландыруға мүмкіндік беретінін көрсетті.

            Сонымен қатар, Бекбау Б. Е. соңғы бөлімде жер асты сулары мен топырақты ремедиациялау процестерін болжауда машиналық оқытуды қолдануды қарастырды. Үлкен деректер базасына негізделген модельдер күрделі бейсызық тәуелділіктерді анықтауға мүмкіндік беріп, жоғары дәлдікпен болжау жасауға қол жеткізді. Бұл бағыт инженерлік шешімдер қабылдауда жаңа мүмкіндіктер ашады.